"Kanpaldi Teknologikoa" proiektuak DUALIZA ORIENTAren babesa jaso du
IMH LHII ikastetxea DUALIZA ORIENTAren laguntza jasoko duten zentroetako bat izan da Kanpaldi Teknologikoa proiektua garatzeko. Ekimen honen helburua ikasleentzako esperientzia eraldatzailea eskaintzea da, garapen pertsonala, soziala eta profesionala bultzatuz, eta inguruko aukerekin eta erronka berriekin konektatuz.
Ekintza hau “Inspirazio Iturri diren Konexioak: berdinen arteko orientazioa eta laguntza” proiektuaren baitan kokatzen da, makina-erremintarekin eta ekintzailetzarekin estuki lotutako ikastetxe batean. Testuinguru honetan, proiektua ikasketak uzteko arriskuan dauden Debabarreneko eta Urolako DBHko gazteei zuzenduta dago.
Helburuen artean gazte horiek ikasketekin jarraitzeko gogoa piztea eta etorkizun profesional arrakastatsua lortzeko hezkuntzaren garrantziaz jabetzea daude. Era berean, beren komunitateko industria-ondarearekin konektatzea bilatzen da, eta garapen horretan parte sentiaraztea.
Kanpaldian zehar, DBHko ikasleek Lanbide Heziketako tailerrak bertatik bertara ezagutzeko aukera izango dute, ibilbide hori zertan datzan ulertzeko eta arlo teknologiko ezberdinekin lotutako jarduera praktikoetan parte hartzeko.
Era berean, Lanbide Heziketako ikasleek mentore lana egingo dute, beren ezagutza teknikoak eta gaitasun sozialak balioan jarriz eta komunitatean erreferente gisa jardunez.
IMHtik oso positiboki baloratzen da DUALIZA ORIENTAren babesa, Lanbide Heziketa inklusiboagoa, ingurunearekin konektatuagoa eta ikasleen garapen integralerako konprometitua eraikitzen jarraitzeko aukera ematen duelako.
